Partia Demokratike e Kosovës ka mbështetur nismën e presidentit të Kosovës Hashim Thaçi për ndryshimin e misionit të FSK-së në forcë ushtarake.

Agim Çeku nga PDK,  ka thënë se partia e tij vlerëson lartë iniciativën e presidentit  dhe se Thaçi i është përgjigjur obligimeve kushtetuese si komandant suprem i FSK-së.

“I është përgjigjur pozitivisht pritjeve të qytetarëve të Kosovës dhe spektrit politik. I është përgjigjur nevojave të kohës”, tha Çeku.

Me këtë veprim sipas Çekut po rrumbullakohet një proces historik me FSK-në ushtri të Kosovës.

Ai ka bërë thirrje për unitet sa i përket kësaj çështje, duke thënë se themelimi i ushtrisë është në të mirën e të gjithëve.

“Ftoj të gjithë ata që kanë rezerva në ndërrimin e ushtrisë së Kosovës se ky veprim nuk është drejtuar kundër askujt por është në të mirë të të gjithëve. Ushtria e ardhshme do të jetë faktor stabiliteti”, tha Çeku.

Ai shtoi se  PDK do të angazhohet gjatë procedimit të ligjit që ta kemi një ligj që e bene FSK-në ushtri të ndërtuar me standarde te NATO-s  por me identitet të  Kosovës si forcë multientnike.

Këto deklarata Çeku i bëri gjatë një konference për media  pasi që presidenti i dorëzoi kryeparlamentarit Kadri Veseli  projektligjin për FSK-në.